Forsætisráðherrann heiðrar Jenson Button

Gordon Brown, forsætisráðherra Breta sendi Jenson Button kveðjur eftir að hann tryggði sér heimsmeistaratitilinn í Formúlu 1 í gær. Bretar hafa átt 10 heimsmeistara og meir en 50.0000 manns starfa við akstursíþróttir í Bretlandi.

Bernie Ecclestone hefur oft kvartað yfir því að ríkisstjórn Bretlands styðji ekki betur við bakið á Formúlu 1 þar í landi, en Brown sá í það minnst ástæðu til að senda meistaranum skeyti.

"Ég sendi hlýjar kveðjur til Jenson Button sem vann titilinn á sömu braut og Lewis Hamilton tryggði titilinn í fyrra. Bretar eru stoltir af afreki Buttons og það að hann er tíundi meistari okkar. Frammistaða hans með hinu nýja Brawn liði hefur heillað Breta og áhugamenn um heim allan. Við hlökkum til að fylgjast með framgangi Buttons á komandi vertíðum", sagði Brown.

Minnstu munaði að Button yrði atvinnulaus þegar Honda liðið ákvað að hætta í Formúlu 1, en með harðfylgi tókst Ross Brawn að halda liðinu á floti. Keypti búnað liðsins og samdi við Mercedes um vélar. Button vann sex af sjö fyrstu mótum ársins og það lagði grunn að titlinum sem hann tryggði sér í gær.

Sjá allt um feril Buttons