Tvö ólík gengi á krónunni

Krónan styrktist um 0,5 prósent í gær og endaði vísitala hennar í 194 stigum. Hún hefur nú styrkst um 13,8 prósent á hálfum mánuði.

Talsverður munur er þó á skráningu á gjaldeyrismarkaði hér og hjá evrópska seðlabankanum.

Bandaríkjadalur er skráður hér á tæpar 113,9 krónur en hjá evrópska bankanum á 225 krónur. Þá stendur evran í 146 krónum hér en 288,5 krónum úti. Munurinn nemur 97 prósentum, sem er svipaður munur og á öðrum gjaldmiðlum.

Ástæðan fyrir muninum skýrist af mjög litlum viðskiptum með krónur á erlendum gjaldeyrismörkuðum og höftunum hér. Munurinn hverfur væntanlega þegar krónan flýtur á ný, samkvæmt upplýsingum frá gjaldeyrisborði Glitnis.- jab