Jafntefli hjá Guðjóni

Guðjón Þórðarson náði jafntefli gegn Milwall á útivelli í sínum fyrsta leik sem knattspyrnustjóri Crewe.

Dennis Lawrence kom Crewe yfir á 12. mínútu en Milwall komst 2-1 yfir með mörkum á síðustu fimm mínútum fyrri hálfleiksins.

Danny Shelley skoraði svo jöfnunarmark Crewe á 58. mínútu og þar við sat. Liðin mætast því á nýjan leik í bikarnum á heimavelli Crewe.

Hermann Hreiðarsson kom ekki við sögu er Portsmouth gerði markalaust jafntefli við Bristol City.

Aron Einar Gunnarsson lék allan leikinn fyrir Coventry sem vann 2-0 sigur á Kidderminster.

Jóhannes Karl Guðjónsson lék allan leikinn fyri Burnley sem gerði markalaust jafntefli við QPR á útivelli. Heiðar Helguson var ekki í leikmannahópi QPR í dag.

Grétar Rafn Steinsson lék allan leikinn í liði Bolton sem tapaði 2-1 fyrir Sunderland. Kenwyne Jones og Djibril Cisse skoruðu mörk Sunderland en Euzebiusz Smolarek mark Bolton. Grétar Rafn var einn fimm leikmanna Bolton sem fékk gult spjald í leiknum.

Þá vann Íslendingaliðið West Ham 3-0 sigur á Barnsley. Herita Ilunga, Mark Noble og Carlton Cole skoruðu mörk West Ham.

Gylfi Þór Sigurðsson kom inn á sem varamaður er Reading tapaði 2-0 fyrir Cardiff á útivelli. Hvorki Ívar Ingimarsson né Brynjar Björn Gunnarsson voru í leikmannahópi Reading.