Stuldur þegar eignir gömlu bankanna voru færðar yfir í þá nýju

Agnar Hansson bankastjóri Sparisjóðabanka segir erfitt að selja eignir þar sem erlendir lánadrottnar telji að íslensk stjórnvöld hafi stolið eignum þegar þær voru færðar úr gömlu bönkunum yfir í þá nýju. Þetta kom fram í seinni fréttum Sjónvarpsins í kvöld. Agnar sagðist því miður ekki bjartsýnn á að samningar næðust við erlenda lánadrottna.

Hann sagði að staðan væri erfið en bankinn væri þó bjartsýnn á að þær samningaviðræður sem nú séu í gangi á milli erlendu lánadrottnanna, ríkissins og þeirra.

Hann sagði þó hættu á að erlendir lánadrottnar gerðu eignir bankanna erlendis upptækar því í augum þeirra hefði ekkert annað en stuldur átt sér stað þegar eignir voru teknar úr gömlu bönkunum og færðar yfir í þá nýju.

Hann sagðist þekkja af samtölum sínum við þessa aðila að menn væru vægast sagt öskuillir vegna þessa. Agnari finnst einkennilegt hversu lítið hafi verið vikið að því í umræðunni hversu erfitt sé að ná sáttum við erlendu lánadrottnanna. Hann sagðist því miður ekki vera of bjartsýnn á að samningar náist við þessa aðila.