Davíð og Eiríkur kvöddu starfsfólk Seðlabankans

Þeir Davíð Oddsson og Eiríkur Guðnason bankastjórar Seðlabanka Íslands kvöddu starfsfólk bankans á sérstökum fundi í morgun. Var fundurinn haldinn í Sölvhól og mættu um 100 manns eða nær allir starfsmenn bankans.

Markús Möller einn af hagfræðingum bankans segir að um smekklega og látlausa athöfn hafi verið að ræða en hann minnist ekki þess að hafa séð jafnmarga starfsmenn bankans samankomna áður. Lauk fundinum með dynjandi lófaklappi starfsfólksins.

„Það er að sjálfsögu sjónarsviptir að mönnum eins og þeim tveimur," segir Markús sem starfað hefur í bankanum síðan árið 1976 er hann hóf þar vinnu sem sumarmaður og þekkir því gerla starfsemi bankans.

„Ég man að þegar ég kom til starfa við bankann 1976 var Eiríkur einhver alöflugasti starfsmaðurinn í hagfræðideildinni," segir Markús. „Og hann var lífið og sálin í deildinni þar til hann fluttist upp á loft."

Markús nefnir sem dæmi um hve öflugur Eiríkur hafi verið að hann hannaði töflurit sem gerir auðvelt að sjá stöðuna í lánakerfinu hverju sinni. „Þetta hefur svo þróast í gegnum tíðina en grunnurinn sem Eiríkur lagði er enn til staðar," segir Markús.