Fimmtán milljarða afskrift vegna Kaupþingsforstjóra

Kaupþing gæti þurft að afskrifa tæpa 15 milljarða vegna hlutabréfakaupa Sigurðar Einarssonar, fyrrverandi stjórnarformanns bankans, og Hreiðars Más Sigurðssonar, fyrrverandi forstjóra. Sigurður tók sjálfur ákvörðun um að aflétta persónulegri ábyrgð sinni á láninu.

Starfsmenn gamla Kaupþings fengu um 50 milljarða króna að láni hjá bankanum til þess að kaupa í honum hlutabréf. Flestir gerðu kaupin í sínu eigin nafni en þó eru nokkur dæmi um að starfsmenn hafi stofnað einkahlutafélag í kringum kaupin. Hreiðar Már Sigurðsson, fyrrverandi forstjóri Kaupþings, stofnaði félag í sínu nafni og fékk lán til hlutabréfakaupanna í bankanum. Lánið hljóðaði upp á tæpan 3 og hálfan milljarð og er kúlulán, með eina greiðslu árið 2011. Frá því að lánið var tekið hefur krónan veikst gríðarlega hefur upphæð lánsins því rúmlega tvöfaldast. Það stendur í rúmum 7 milljörðum í dag. Miðað við tilkynningar um hlutafjárkaup Sigurðar Einarssonar, fyrrverandi stjórnarfomanns Kaupþings, má draga þá ályktun að skuldastaða Sigurðar sé svipuð og Hreiðars. Sigurður keypti hlutabréfin í sínu nafni og ætti því að bera persónulega ábyrgð á láninu.

Hann ákvað hinsvegar ásamt stjórn gamla Kaupþings að fella niður persónulegar ábyrgðir starfsmanna á lánum til hlutabréfakaupa í bankanum. Hann ber því enga persónulega ábyrgð á lántöku sinni. Þegar bankanum var skipt í gamla og nýja Kaupþing fluttust þessar kröfur yfir í nýja bankann. Strangt til tekið er ekki búið að afskrifa þessi lán en Deloitte vinnur nú að endurverðmati á þeim. Gamli bankinn mun þá bera kostnaðinn af niðurfærslunni og eru það því erlendir kröfuhafar sem blæða fyrir hlutabréfakaup fyrrum forsvarsmanna bankans, í þessu tilviki tæpa 15 milljarða. Til að setja þá tölu í samhengi þá er fyrirhugaður niðurskurður í heilbrigðiskerfinu 2,6 milljarðar, sem er innan við 20% af afskrift vegna hlutabréfakaupa þeirra félaga. Ekki náðist í Hreiðar Má og Sigurð í dag.