Ein besta þjóðhátíð frá upphafi

Birgir Guðjónsson, formaður þjóðhátíðarnefndar, var nýkominn inn í Herjólfsdal þegar fréttastofa náði tali af honum.

Þar var að hans sögn líkt og engin hátíð hafi verið haldin og búið að hreinsa svæðið algjörlega.

„Veðrið er alveg dásamlegt og fólk er farið að týja sig í dalinn og hreinsa tjöldin eftir nóttina," segir Birgir og segist ekki muna eftir öðru eins veðri á þjóðhátíð.

Í eftirmiðdaginn kemur Örn Árnason til með að skemmta, auk þess sem barnaball er á dagskránni.

Þegar kvöldið færist yfir tekur svo við hljómleikahald í brekkunni, þar sem Land og Synir, Skítamórall og Í svörtum fötum halda ásamt öðrum uppi stuðinu, að ógleymdum brekkusöngnum sem Árni Johnsen, fyrrum þingmaður, stjórnar með stæl.

Hljómsveitin Egó með Bubba Morthens í broddi fylkingar átti þjóðhátíðarlagið í ár, Eyjan græna, en Birgir segir undirtektirnar þegar lagið var frumflutt á föstudag óviðjafnanlegar.

Birgir segist halda að um 11.000 manns hafi verið á hátíðinni í gær og telur víst að enn bætist í hópinn í dag með bæði flugi og siglingum.

„Þetta er ein besta þjóðhátíðin frá upphafi, og örugglega sú fjölmennasta," segir Birgir að lokum.