Cannavaro: Fjölmiðlar kýldu mig í punginn

Ítalski landsliðsmaðurinn, Fabio Cannavaro, segir að ítalskir fjölmiðlar hafi gengið allt of langt í umfjöllun sinni þegar hann féll á lyfjaprófi. Hann hefur nú verið hreinsaður af ásökunum.

„Ég var sleginn í punginn og það var sárt. Ef þið skiljið ekki hvað ég er að segja þá skal ég endurtaka það," sagði Cannavaro reiður á blaðamannafundi.

„Samviska mín er hrein. Ég var stunginn af býflugu en í blöðunum má lesa að ég sé að nota ólögleg lyf. Þegar ég sá þetta fyrst hélt ég að mig væri að dreyma. Það er búið að gera allt of mikið úr þessu máli. Ég vona að málinu sé lokið enda hef ég alltaf farið eftir settum reglum."