Kröfuhafar hafa tekið yfir Askar Capital

Kröfuhafar Askar Capital hafa nú tekið yfir félagið. Þetta kemur fram í tilkynningu um aðalfund félagsins sem haldinn var fyrir helgina.

Stærsti hluthafi félagsins er Glitnir Banki hf. með 53,3% hlut en næststærsti hluthafi er Saga Capital hf. með 18,1% hlut. Tíu aðrir hluthafar eiga samtals 28,6% hlut í félaginu.

Hlutafé fyrri hluthafa hefur verið fært niður að fullu en Moderna Finance AB átti 80,8% á móti 19,2% hlut 15 annarra hluthafa.

Í tilkynningu Askar Capital til kauphallarinnar þann 15. maí sl. kom fram að allir óveðtryggðir lánveitendur móðurfélags Askar hefðu samþykkt tillögur félagsins um fjárhagslega endurskipulagningu.

Eigið fé Askar Capital samstæðunnar að loknum þessum breytingum er um átta milljarðar króna og eiginfjárhlutfall samkvæmt lögum um fjármálafyrirtæki um 19%.

Aðalfundur Askar Capital var haldinn þann 19. júní sl. Á fundinum var ársreikningur félagsins fyrir árið 2008 samþykktur og ný stjórn kjörin. Í aðalstjórn félagsins tóku sæti: Eiríkur Jóhannsson framkvæmdastjóri, Gestur Jónsson hrl., Heimir Haraldsson lögg. endurskoðandi, Ragnar Halldór Hall hrl. og Þórólfur Jónsson hdl.