Tchenguiz í vandræðum með hótelkeðju

Menzies-hótelkeðjan, sem er í eigu íranska Íslandsvinarins Robert Tchenguiz, rambar nú á barmi gjaldþrots. Hótelkeðjan þarf að endursemja um lán sín eftir að hafa brotið lánaskilmála. Þetta kemur fram í The Sunday Times í dag.

Þetta er enn eitt áfallið fyrir Tchenguiz sem hefur þurft að horfa upp á viðskiptaveldi sitt molna í sundur að undanförnu.

Tchenguiz, sem hefur verið mikið í fréttum hér á Íslandi vegna óvenjulegrar lánafyrirgreiðslu sem hann naut af hálfu Kaupþings, þarf væntanlega að greiða allt að fimm milljónir punda, um 850 milljónir íslenskra króna, í reiðufé til að koma hótelkeðjunni til bjargar.

Hann keypti Menzies á 180 milljónir punda, 30 milljarða íslenskra króna, undir lok ársins 2006 og yfirtók þá skuldir upp á rúma 38 milljarða frá HBOS-bankanum.