Stjórnendur Kaupþings velta sér ekki upp úr lögbannságreiningi

Hulda Dóra Styrmisdóttir, formaður stjórnar Kaupþings, segir að sá ágreiningur sem hafi verið uppi á milli stjórnar bankans og bankastjóra um lögbannið á fréttaflutning RÚV séu gamlar fréttir.

Stjórn bankans sendi starfsmönnum hans tölvupóst í síðustu viku þar sem kom fram að stjórn bankans hafi ekki átt þátt í ákvörðun Finns Sveinbjörnssonar bankastjóra á laugardag fyrir verslunarmannahelgi um lögbann á fréttaflutning RÚV af lánabókum bankans sem hafi þegar verið komnar á netið. Stjórn bankans harmi þann skaða sem af málinu hafi hlotist fyrir orðspor bankans.

„Við erum komin á allt annan stað núna. Það sem er í gangi í bankanum núna, það er eins og þú veist að verið að klára samningaviðræður við kröfuhafa. Þannig að gamlar fréttir eru bara gamlar fréttir," segir Hulda Dóra í samtali við Vísi. „Finnur er núna í vikufríi sem var löngu ákveðið og Björk Þórarinsdóttir er staðgengill hans," segir Hulda Dóra. Hún segir að stjórnendur bankans vinni hörðum höndum að þeim verkefnum sem fyrir liggja.