Segir lánadrottna taka vel í tilboð Mjólku

Ólafur M. Magnússon framkvæmdarstjóri Mjólku segir að samningar við lánadrottna gangi vel. Allir stærstu lánadrottnar félagsins sem og viðskiptabanki þess, hafi gengið að tilboði sem félagið bauð þeim. Ólafur er þakklátur fyrir það góða samstarf og mikla skilning sem félaginu hefur verið sýnt á þessum erfiðu tímum. Nú standi yfir viðræður við að fá nýja fjárfesta inn í félagið en í þeim hópi eru bæði innlendir og erlendir aðilar.

„Það hefur gengið mjög vel og við erum gríðarlega þakklátir fyrir það góða samstarf og mikla skilning sem lánadrottnar hafa sýnt okkur. Það var erfið ákvörðun að óska eftir að menn gæfu hluta af kröfum sínum eftir. Nú förum við á fullt í það að endurfjármagna félagið og koma fjáhag þess á réttan kjöl með þessu samstillta átaki," segir Ólafur en rekstur Mjólku hefur verið afar erfiður síðustu mánuði.

Lánadrottnum félagsins var boðið að gefa eftir hluta krafna sinna líkt og Vísir sagði frá fyrr í dag.

„Þetta var mjög erfið ákvörðun fyrir mig persónulega að fara þessa leið. Við höfum hinsvegar átt því láni að fagna að vera í góðu sambandi við okkar birgja og unnið þetta með þeim. Þetta lýsir því hvernig atvinnulífið er að takast á við þennan vanda. Fyrirtækin í landinu eru að hjálpast við að takast á við þetta."

Ólafur segir að nú standi yfir viðræður við nýja fjárfesta bæði innlenda og erlenda. Einn af þeim sé Kaupfélag Skagfirðinga.

„Í þessari endurskipulagningu höfum við reynt að fá inn nýja fjárfesta til þess að kaupa reksturinn og við höfum reynt að hámarka það sem við höfum til ráðstöfunar fyrir lánadrottnana með þessum hætti. Þetta snýst um að við getum gert þennan rekstur bærilegan og þannig fengið fjárfesta til okkar. Þetta er svipað og að bjóða gestum í heimsókn, þá verðurðu að taka til í stofunni áður, svo það sé ekki allt í drasli," segir Ólafur.

Ólafur segir stöðu fyrirtækisins mun betri nú en áður en menn fóru í umræddar aðgerðir. Mjólka hafi færst langt frá því að fara í gjaldþrot eins og útlit var fyrir.

„Allir stærstu lánadrottnar okkar hafa samþykkt umrædd tilboð. Það eru einungis fjórir til fimm aðilar sem eiga eftir að svara en ég á von á því að fá svar núna í fyrri hluta vikunnar. Okkar banki hefur einnig samþykkt þetta upplegg okkar."