Forsvarsmenn Baugs ánægðir með greiðslustöðvun

Baugur Group hf. fékk greiðslustöðvun í Héraðsdómi Reykjavíkur í dag. Greiðslustöðvunin er veitt til fjórða mars næstkomandi. Stefán H. Hilmarsson, fjármálastjóri Baugs segist mjög ánægður með niðurstöðuna og segir að nú verði farið í að ná fram lausn með kröfuhöfum félagsins.

„Við erum mjög ánægðir með þetta," segir Stefán í samtali við fréttastofu. „Nú höldum við áfram okkar vinnu og við munum boða kröfuhafa til fundar við okkur mjög fljótlega og fara yfir málin með þeim, eins og við höfum raunar verið að gera síðastliðna fjóra mánuði," segir Stefán og bætir við að Baugsmenn hafi hingað til verið í góðu samstarfi við kröfuhafa félagsins.

„Við höfum fulla trú á því að það sé hægt að ná fram launsn í þessum málum," segir Stefán. Hann segir að það verði að koma í ljós hvort Baugur þurfi að óska eftir framlengingu á greiðslustöðvuninni í mars.