Hagnaður Alfesca drógst saman um tæp 20%

Nettóhagnaður Alfesca á fjórða ársfjórðung síðasta árs nam 17,8 milljónum evra eða rúmlega 2,6 milljörðum kr. sem er 19,8% samdráttur m.v. sama ársfjórðung 2007.

Í tilkynningu um uppgjör félagsins segir að þrátt fyrir góða jólasölu hafði efnahagssamdráttur veruleg áhrif á afkomu ársfjórðungsins.

„Alfesca tókst að ná jafngóðri sölu og á síðasta ári þrátt fyrir umtalsverðan samdrátt í almennri neyslu á 2. ársfjórðungi. Þessi árangur náðist með því að leggja fé í markaðssetningu og stýra verði til að tryggja að við værum samkeppnishæf en það setti pressu á framlegðina," segir Xavier Govare forstjóri félagsins.

„Það er ánægjulegt að með markvissum markaðsaðgerðum allan ársfjórðunginn tókst okkur að viðhalda vexti og tryggja markaðsleiðandi stöðu í sölu á reyktum laxi og andalifarkæfu yfir hátíðarnar. Labeyrie hélt 23,7 og 20,6% markaðshlutdeild í þessum vöruflokkum."

Xavier Govare reiknar með að markaðsaðstæður á seinni hluta fjárhagsársins verði mjög erfiðar og að almanaksárið muni almennt einkennast af ókyrrð í kjölfar þess að væntingar neytenda hafa fallið umtalsvert undanfarna mánuði.

„Við gerum einnig ráð fyrir að mánuðirnir framundan muni einkennast af ókyrrð á gjaldeyrismörkuðum eftir því sem áhrif efnahagskreppunnar koma í ljós. Viðbrögð okkar við ástandinu eru að leita leiða til að halda föstum kostnaði samstæðunnar í skefjum, auka skilvirkni og halda öflugri vöruþróun áfram í þeim tilgangi að auka fjölbreytni og styrkja stöðu okkar á lykilmörkuðum," segir Xavier Govare.