Almenningur aldrei eins jákvæður gagnvart Íbúðalánasjóði

Viðhorf almennings gagnvart Íbúðalánasjóði hefur aldrei mælst eins jákvætt og nú ef marka má viðhorfsrannsóknir Capacent Gallup. Aðeins 3,9% segjast nú vera frekar eða mjög neikvæðir gagnvart sjóðnum, en 14,3% segjast hvorki neikvæðir né jákvæðir. Alls segjast 81,7% jákvæðir í garð Íbúðalánasjóðs, þar af eru 45% mjög jákvæðir og 36,7% frekar jákvæðir. Þeir sem eru mjög jákvæðir hafa ekki verið svo margir áður, eða 45%, en voru 28,5% fyrir þremur árum, 30,4% fyrir tveimur árum og 39% fyrir einu ári.

93,8 prósent telja að Íbúðalánasjóður eigi að starfa áfram í óbreyttri mynd. Þessi tala hefur líka hækkað jafnt og þétt í könnunum á undanförnum árum. Þannig töldu 74,2% að sjóðurinn ætti að starfa óbreyttur áfram fyrir þremur árum, 82,9% voru þeirrar skoðunar fyrir tveimur árum og 85,8% fyrir ári. Í könnuninni var meðal annars spurt hvort menn teldu að lán í íslenskum krónum ættu að vera verðtryggð áfram. 23,6% vildu halda verðtryggingunni, en 76,4% vildu afnema hana.

60,8% sögðust telja ólíklegt að þeir lentu í greiðsluerfiðleikum vegna afborgana af íbúðarhúsnæði á næstu 6 mánuðum.

55,7% sögðust mjög eða frekar ánægðir með að húsnæðislán sem ekki er hjá Íbúðalánasjóði yrði fært til sjóðsins. 33,4% sögðust hvorki ánægðir né óánægðir, en 10,9 frekar eða mjög óánægðir.

Í könnuninni var meðal annars spurt hversu hátt hlutfall af kaupverði verðtryggð húsnæðislán ættu að vera að hámarki. Flestir, eða 33,6%, töldu að lánin ættu að vera 80% af kaupverði, en 22,1% vildu miða þau við hærra hlutfall kaupverðs en 80%.

Spurt var hver hámarksfjárhæð verðtryggðra húsnæðislána ætti að vera. 44% þeirra sem svöruðu nefndu 30 milljónir eða hærra, 34,8% sögðu 20 - 29 milljónir, 6% töldu 15 - 19 milljónir hæfilega hámarksfjárhæð og 15,2% lægra en 15 milljónir. 74,5% sögðust vilja að Íbúðalánasjóður sæi um slík lán, en 5,4% viðskiptabankar eða sparisjóðir og 19,6% sögðu að báðir aðilar, þ.e. Íbúðalánasjóður og bankar/sparisjóðir, ættu að sjá um húsnæðislánin.

Allir greiðsluseðlar Íbúðalánasjóðs birtast nú rafrænt í heimabönkum, en heimsendingu seðlanna á pappír var hætt í desember sl. 60,4% sögðu að þeim litist vel á þessa ráðstöfun.

1322 manns á landinu öllu á aldrinum 16 - 75 ára voru í úrtaki könnunarinnar, sem var gerð 24. nóvember til 8. desember 2008. Svarhlutfall var 64,1%.