Greiðslustöðvun Baugs snertir ekki Haga

Greiðslustöðvun Baugs hefur ekki áhrif á rekstur Haga, segir Finnur Árnason, forstjóri fyrirtækisins, í orðsendingu til fjölmiðla. Finnur segir að Hagar séu sjálfstætt félag, með sjálfstæðan rekstur og efnahag. Rekstur Haga hafi gengið ágætlega á yfirstandandi rekstrarári, sem ljúki nú í lok febrúar. Gera megi ráð fyrir að afkoma félagsins fyrir fjármagnsliði og afskriftir verði betri en á því rekstrarári sem lauk í lok febrúar 2008. Þá hafi afkoma fyrir fjármagnsliði og afskriftir verið 2.906 milljónir króna.

Finnur segir að fjármagnsliðir félagsins séu hinsvegar neikvæðir, meðal annars vegna mikillar veikingar íslensku krónunnar, verðbólgu og vegna afskrifta á fjárfestingum, sem að hluta til hafi komið fram í 6 mánaða uppgjöri félagsins, sem var birt í októbermánuði. Staða Haga sé því sterk, hvort sem horft sé á rekstur eða efnahag félagsins.