Landsframleiðslan dróst saman um 0,8%

Landsframleiðsla er talin hafa dregist saman um 0,8% að raungildi á 3. fjórðungi 2008 frá sama fjórðungi árið áður.

Þetta kemur fram í hagvísum Hagstofunnar. Á tímabilinu drógust þjóðarútgjöld saman um 9,7%. Einkaneysla er talin hafa dregist saman um 6,7% en samdrátt hennar má meðal annars rekja til minni bílakaupa, en þau drógust saman um rúmlega 60% á ársfjórðungnum.

Fjárfesting er talin hafa dregist saman um 27,9% á 3. ársfjórðungi miðað við sama tíma í fyrra. Fjárfesting atvinnuveganna dróst saman um rúmlega 33,7% og fjárfesting í íbúðarhúsnæði um 35,8%. Fjárfesting hins opinbera jókst aftur á móti um 2,9%. Þá er talið að samneysla hafi vaxið um 3% og útflutningur um 17,6% en innflutningur dróst saman um 9,7%.

Árstíðaleiðrétt landsframleiðsla dróst saman um 3,4% frá 2. ársfjórðungi 2008 til 3. ársfjórðungs 2008 eftir 4,7% vöxt í ársfjórðungnum þar á undan.