Jackson ætlar að hætta eftir næsta tímabil

Phil Jackson þjálfari LA Lakers ætlar að hætta þjálfun eftir næsta keppnistímabil með LA Lakers. Þetta segir hann í viðtali við Magic Johnson sem sýnt verður á ABC sjónvarpsstöðinni í kvöld.

Samningur Jackson við Lakers rennur út eftir næstu leiktíð og ef svo fer sem horfir gæti þessi frábæri þjálfari verið búinn að afreka það að verða eini þjálfarinn í sögu NBA til að vinna tíu meistaratitla.

Jackson á að baki níu titla líkt og goðsögnin Red Auerbach heitinn sem þjálfaði gullaldarlið Boston upp úr miðri síðustu öld.

Jackson vann sex titla með Chicago Bulls (1991-93 og 1996-98) og þrjá með LA Lakers (2000-02). Þá hefur hann í tvígang tapað í lokaúrslitum með Lakers - árin 2004 og 2008.