Vaknaði með svart eitur í andlitinu

Maður leitaði ásjár lögreglunnar í Vestmannaeyjum á laugardag eftir að hafa vaknað úr áfengisdái með svartleitt eitur framan í sér.

Samkvæmt heimildum fréttastofu hafði maðurinn sofnað í brekkunni og einhver óprúttinn makað efninu framan í hann, en lögregla gat ekki staðfest tildrög málsins.

Lögregla aðstoðaði hann eftir bestu getu við að ná efninu framan úr sér, en maðurinn kvartaði undan miklum sviða og bruna undan svertunni og gekk illa að þrífa efnið framan úr sér.

Honum var vísað til læknis um frekari aðstoð, en kærði atvikið ekki.