Landlæknir segir aðgengi að geðdeildum vera gott

„Það er engin geðdeild á sjúkrahúsinu á Akranesi, en geðdeildarmóttakan í Reykjavík er einnig ætluð öðrum landsmönnum. Hér á landi er aðgengi að geðdeild betra en gengur og gerist í nálægum löndum, að minnsta kosti fyrir þá sem búa í Reykjavík og nágrenni " segir Matthías Halldórsson landlæknir.

Fréttastofa sagði frá því í morgun að karlmaður sem ók stolnum bíl í gegnum bílskúrshurð lögregustöðvarinnar á Akranesi í fyrrakvöld, og á lögreglubíl þar inni, var í örvæntingu að kalla eftir aðstoð. Hann á við geðræn vandamál að stríða og hafðist krafist örvandi lyfja hjá vakthafandi lækni á Akranesi, sem vildi ekki verða við þeirri kröfu. Varðstjóri hjá lögreglunni á Akranesi fullyrti jafnframt í bréfi til fjölmiðla að hann hafi viljað fá innlögn á geðdeild.

Matthías segist hafa rætt við þann lækni á Akranesi sem hafi verið í samskiptum við manninn um helgina. Matthías segist telja að viðbrögð viðkomandi læknis við umleitunum mannsins hafi verið rétt. Hins vegar hafi maðurinn ekki viljað þiggja þá aðstoð sem honum bauðst. Erfitt sé að fara eftir öllum kröfum fólks um innlagnir eða lyfjagjafir. „Aðgengi að geðdeildarmóttöku er tiltölulega gott en það er aldrei hægt að koma í veg fyrir alla skapaða hluti," segir Matthías. Hann segir að aðalatriðið sé að fólki sé ekki hafnað á röngum forsendum.