Ók inn í lögreglustöð eftir að hafa verið vísað frá geðdeild

Karlmaður ók inn í lögreglustöðina á Akranesi á sunnudagskvöld síðasta. Samkvæmt lýsingu lögregluvarðstjóra ók maðurinn í gegnum bílskúrshurð og aftan á lögreglubifreið sem var inni í skúrnum. Lögreglubifreiðin hentist fram á við og lenti á vinnuborði sem er inni í skúrnum. Skemmdist lögreglubifreiðin bæði að framan og aftan en bifreiðin sem maðurinn ók var óökufær eftir ákeyrsluna. Bílskúrshurðin er ónýt. Að sögn lögreglunnar er það mesta mildi að enginn var við vinnu í bílskúrnum þegar maðurinn ók þar inn.



Vildi fá innlögn á geðdeild

Lögreglan segir að maðurinn hafi leitað á Sjúkrahúsið á Akranesi til að fá innlögn á geðdeild en hann glími við geðrænan sjúkdóm. Hafi honum verið vísað frá og hann gripið þá til þess ráðs að stela bifreið sem var staðsett á móti sjúkrahúsinu og ekið sem leið lá á lögreglustöðina og inn í bílskúrinn. Þegar lögreglumenn handtóku manninn hafi hann óskað eftir vistun á lögreglustöð þar til hann fengi vistun á geðdeild. Maðurinn var lagður inn á geðdeild daginn eftir.