Kröfum Jóns Ásgeirs og Kristínar vísað frá dómi

Héraðsdómur hefur vísað frá kröfu systkinanna Jóns Ásgeirs Jóhannessonar og Kristínar Jóhannesdóttur um að rannsókn á meintum skattalagabotum þeirra yrði úrskurðuð ólögmæt.

Krafa þeirra var í fyrsta lagi rökstudd með því að rannsókn á Baugsmálinu hafi staðið óhæfilega lengi yfir. Hefði ríkislögreglustjóri brotið gegn rétti þeirra systkina til réttlátrar málsmeðferðar innan hæfilegs tíma með því að ljúka ekki rannsókn málsins fyrr. Í öðru lagi var krafan rökstudd með því að settur ríkislögreglustjóri hefði ekki lagt sjálfstætt mat á rannsóknina. Hinum reglulega ríkislögreglustjóra hafi verið gert að víkja sæti við rannsókn málsins og annar maður settur til að gegn störfum hans við hana.

Systkinin óskuðu þess til vara að Helga Magnúsi Gunnarssyni, saksóknara efnahagsbrota við embætti ríkislögreglustjóra, yrði gert að víkja sæti við rannsókn málsins. Sú krafa var rökstudd með því að saksóknarinn hefði verið svo viðriðinn rannsókn svonefnds Baugsmáls allt frá upphafi þess að hann væri vanhæfur til að stýra rannsókn þessa máls.

Í niðurstöðu þeirra dómara sem úrskurðuðu um kröfu systkinanna segir að málið sem ákært sé í hafi verið til rannsóknar hjá ríkislögreglustjóra þegar krafan barst dóminum. Þeirri rannsókn sé hins vegar lokið og hafi ákæra verið gefin út og falin ákveðnum dómara til meðferðar. Eftir þann tíma verði fjallað um allar kröfur sem varði rannsóknina og hæfi þeirra sem hana önnuðust í tengslum við meðferð málsins samkvæmt ákærunni. Á þessum forsendum var kröfum systkinanna vísað frá dómi.