Eimskip fær heimild til nauðasamnings

Héraðsdómur Reykjavíkur hefur fallist á að veita Eimskip heimild til að leita nauðasamnings samkvæmt frumvarpi félagsins. Garðar Garðarsson hæstaréttarlögmaður var skipaður umsjónarmaður með nauðasamningsumleitunum félagsins.

Í tilkynningu segir að frumvarp að nauðasamningi hljóði svo:

"Lánardrottnum sem fara með samningskröfur er boðið að breyta kröfum sínum á hendur Eimskip í L1003 ehf. , sem verður breytt í Eimskipafélag Íslands ehf. eða "Nýja-Eimskip" sem má jafna til að þeim sé boðin greiðsla á 11,9% krafna sinna.

Eimskip mun afhenda 54,1% af hlutafé Nýja Eimskips til lánardrottna, en það samsvarar greiðslu á 11,9% krafna þeirra. Afhendingin mun eiga sér stað svo fljótt sem verða má og eigi síðar en innan 30 daga frá því að nauðasamningur telst kominn á.

Engir vextir verða greiddir vegna krafna lánardrottna frá þeim degi sem frumvarp þetta telst komið á og þar til hlutafé Nýja Eimskips verður flutt til lánardrottna.

Trygging verður ekki veitt fyrir greiðslum samkvæmt framangreindu."