Viðsnúningur ríkissjóðs orðinn 72 milljarðar til hins verra

Samkvæmt greiðsluuppgjöri ríkissjóðs fyrir fyrstu fimm mánuði ársins er handbært fé frá rekstri neikvætt um tæpa 37 milljarða króna, sem er 72,4 milljörðum lakari útkoma heldur en sama tímabil í fyrra.

Þetta kemur fram í nýju vefriti fjármálaráðuneytisins. Þar segir að innheimtar tekjur ríkissjóðs á fyrstu fimm mánuðum ársins voru rúmlega 172 milljarðar kr. sem er um 22 milljarða kr. minni tekjur en á sama tíma árið 2008. Munar þar mest um lægri skatta á vöru og þjónustu.

Skatttekjur og tryggingagjöld námu rúmlega 149 milljarða kr. sem endurspeglar 16,6% samdrátt að nafnvirði eða 29,6% að raunvirði miðað við hækkun almenns verðlags. Þá jukust aðrar rekstrartekjur ríkissjóðs umtalsvert frá sama tíma árið 2008 en þar skýra auknar vaxtatekjur meginmuninn.

Skattar á tekjur og hagnað námu rúmlega 71 milljarða kr. og drógust saman um 4,1% að nafnvirði samanborið við fyrstu fimm mánuði ársins 2008. Þar af nam tekjuskattur einstaklinga rúmum 36 milljörðum kr., tekjuskattur lögaðila tæplega 7 milljörðum kr. og fjármagnstekjuskattur um 28 milljörðum kr.

Innheimta almennra veltuskatta nam rúmlega 57 milljörðum kr. á tímabilinu og dróst saman um 28,2% að nafnvirði á milli ára eða 39,4% að raunvirði. Virðisaukaskattur nam tæplega 39 milljörðum kr. á fyrstu fimm mánuðum ársins og dróst saman um 18 milljarða kr. frá sama tíma 2008. Hvað aðra helstu liði veltutengdra skatta varðar er samdrátturinn milli ára mestur í vörugjöldum af ökutækjum eða yfir 90%.

Greidd gjöld nema 209,1 milljarði kr. og hækka um 50,0 milljarða kr. frá fyrra ári, eða um 31,5%. Milli ára hækka útgjöld mest til almennrar opinberrar þjónustu um 18,5 milljarða, þar sem vaxtagreiðslur ríkissjóðs skýra 15,9 milljarða kr.

Þá hækka útgjöld til almannatrygginga og velferðarmála um 15,4 milljarða kr. sem skýrist að mestu með 9,6 milljarða kr. hækkun útgjalda Atvinnuleysistryggingasjóðs á milli ára, 2,2 milljarðar vegna útgjalda lífeyristrygginga sem hækka um 12,4% og barnabótum sem hækka um 963 milljónir króna milli ára.

Útgjöld til menntamála aukast um 1,8 milljarða króna þar sem útgjöld til Háskóla Íslands aukast um 788 milljónir króna og útgjöld til Lánasjóðs íslenskra námsmanna aukast um tæpar 500 milljónir kr. milli ára. Breytingar í öðrum málaflokkum eru svo minni en þær sem áður hafa verið taldar.