Formúla 1 líkleg í Róm 2012

Rómverjar á Ítalíu eru metnaðarfullir. Í dag er allt á hvolfi útaf úrslitlaleiknum í Meistaradeildinni en árið 2012 vill borgarstjórnin halda Formúlu 1 mót á götum Rómar.

Búið er að gera plan af braut sem Hermann Tilke frá Þýskalandi hefur hannað, en hann hefur haft umsjón með hönnun allra Formúlu 1 brauta sem hafa litið dagsins ljós síðustu ár. Þá hefur hann gert ýmsar endurbætur á gömlum brautum eftir óskum FIA.

Þrjár götubrautir eru í notkun í dag. Það er í Mónakó, sem var keppt á um síðustu helgi, Í Valencia á Spáni og í Singapúr. Brautin í Valencia þótti ekki bjóða upp á sérlega skemmtilegan kappakstur í fyrra, en mótið í Singapúr var flóðlýst og heppnaðist sérlega vel. Þá verður ekið á nýrri braut í Abu Dhabi, sem er um götur hafnarsvæðis rétt utan borgarmarkanna.

Verði mótshald staðreynd í Róm árið 2012, þá er það hluti af hugmyndum Bernie Ecclestone um að götuvæða Formúlu 1 í þekktum borgum, eins og London, Moskvu og New York.