Starfsemi dótturfélaga Straums með eðlilegum hætti

Starfsemi dótturfélaga Straums í Evrópu er með eðlilegum hætti þrátt fyrir yfirtöku Fjármálaeftirlitsins á bankanum s.l. mánudag. Hinsvegar liggur starfsemi útibús bankans í London, verðbréfamiðlunarinnar Teathers enn niðri að stórum hluta.

Georg Andersen yfirmaður samskiptasviðs Straums segir að dótturfélög Straums séu EQ bankinn í Finnlandi, Stamford Partners í London og fjárfestingarbankinn Woods sem Straumur á helming í. Sá banki er síðan með starfsemi í nær öllum löndum mið- og austurhluta Evrópu.

Hvað Teathers varðar lokaði kauphöllin í London fyrir verðbréfamiðlun félagsins á mánudagsmorguninn og hefur ekki opnað fyrir hana aftur en málið er til skoðunar hjá kauphöllinni.

Georg segir að önnur starfsemi Teathers haldi áfram svo sem ráðgjöf og greiningar.