Royal Court á Guernsey heimilar málsókn gegn neyðarlögunum

Umsjónarmenn þrotabús Landsbankans á Guernsey, sem eru frá Deloitte, munu hefja málsókn fyrir íslenskum dómstóli gegn neyðarlögunum fari svo að þeim takist ekki að hámarka endurheimtur fyrir innistæðueigendur bankans á eyjunni. The Royal Court á Guernsey, æðsti dómstóll eyjunnar, hefur nú heimilað umsjónarmönnunum slíka málsókn.

Í umfjöllun um málið á vefsíðunni International Adviser segir að umsjónarmennirnir, Rick Garrard og Lee Manning, hafi sent frá sér yfirlýsingu um málið. Í henni kemur fram að beiðni um málsóknina hafi verið send The Royal Court í framhaldi af kosningu meðal kröfuhafa bankans þar sem mikill meirihluti var meðmæltur þessari málsókn.

Ennfremur kemur fram að málsóknin yrði þrautarlending hjá umsjónarmönnunum. Henni verði ekki hrint í framkvæmd nema svo fari að innistæðueigendurnir verði metnir sem almennir kröfuhafar en ekki í forgangshóp. Ákvörðun um þetta verður tekin á kröfuhafafundi í Reykjavík þann 23. nóvember n.k.

„Við höfum séð hvernig innistæðueigendum hjá Icesave hefur verið bjargað af breskum og hollenskum stjórvöldum," segir í yfirlýsingu Deloitte. „Innistæðueigendur og umsjónarmennirnir (á Gurernsey) eru eðlilega pirraðir og sárir yfir því að þessi stjórnvöld hafa fengið forgang umfram þá.

Samkvæmt Deloitte myndi málsóknin, ef af henni verður, beinast að neyðarlögunum sem sett voru í október s.l. Þau lög hafi undanskilið útibú Landsbankans á Guernsey frá forgangslista innistæðueigenda.

Í tilkynningunni segir að umsjónarmennirnir hafi orðið fyrir vonbrigðum með að hafa ekki fengið stuðning við fyrirhugaða málsókn frá yfirvöldum á Guernsey, breskum stjórnvöldum, fjármálaráðuneytinu breska, laganefnd breska þingsins og Alþjóðagjaldeyrissjóðnum.

Í frétt um málið hér á síðunni í sumar kom m.a. fram að sérstök hagsmunasamtök Icesave innstæðueigenda á eyjunni Guernsey, sem heyrir undir bresku krúnuna, eru æfareið þar sem bresk yfirvöld ætla ekki að ábyrgjast innstæður sparifjáreigendanna að fullu. Sparifjáreigendurnir munu tapa rúmum 1,3 milljörðum króna.

Bresk yfirvöld hafa fullyrt að þau muni ábyrgjast allar Icesave innstæður sparifjáreigenda umfram það sem íslensk stjórnvöld hyggjast ábyrgjast en þar er eyjan Guernsey, milli Englands of Frakklands, undanskilin.