Glock fljótastur á lokaæfingunni

Þjóðverjinn Timo Glock var fljótastur allra á lokaæfingu keppnisliða í Barein í morgun. Hann var þó ekki llánsamari en það að það steidó á bílnum í lok æfingarinnar.

Er enn óljóst hvað gerðist, en Glock sagði í talkerfið að það virtist sem vélin hefði bilað. Það gæti þó verið bundið rafbúnaði bílsins., Glock hefur staðið sig vel í mótum ársins og hefur náð í stigasæti í þeim öllum.

Ferrari menn virðast vaknaðir til lífsins því Felipe Massa var næst fljótastur, Nico Rosberg á Williams varð þriðji, Lewis Hamilton á McLaren fjórði og Kimi Raikkönen á Ferrari fimmti.

Jenson Button á Brawn sem leiðir stigamótið var ekki á meðal fremstu manna, en í gær þóttu allar líkur á því að hann gæti náð fremsta stað á ráslinu.

Kjöraðstæður eru á brautinni, sól og blíða, en nokkuð misvindasamt. Bein útsending er frá tímatökunni á Stöð 2 Sport kl. 10.45.