Landsbankinn gjaldfellir 27 milljarða kröfur á Exista

Exista hefur borist erindi frá skilanefnd Landsbanka Íslands um gjaldfellingu krafna að fjárhæð um 150 milljónir evra eða um 27 milljarða kr. Viðræður standa yfir við fulltrúa skilanefndarinnar, að því er segir í tilkynningu um málið.

Vísað er til tilkynningar Exista frá 1. mars 2009 um að félagið leiti samninga um frestun á greiðslu vaxta og afborgana á skuldbindingum félagsins sem koma til gjalddaga á meðan viðræður við innlendar og erlendar fjármálastofnanir um endurskipulagningu félagsins stendur yfir.

Tekið skal fram að krafa skilanefndar Landsbankans nær ekki til skráðra skuldabréfaflokka Exista.