FME og Kauphöllin endurnýja yfirlýsingu um eftirlit

Forstjórar Fjármálaeftirlitsins (FME) og Kauphallar Íslands hafa endurnýjað yfirlýsingu um eftirlitsverkefni sem Kauphöllin annast fyrir FME.

Þá hafa Kauphöllin og FME einnig endurnýjað samning um að Kauphöllin taki að sér að annast yfirlestur og staðfestingu lýsinga.

Í frétt um málið á heimasíðu FME segir að samkvæmt yfirlýsingunni felur FME Kauphöllinni eftirlitsverkefni sem í megindráttum beinast að upplýsingaskyldu útgefanda, flöggunarskyldu, tilboðsskyldu, tilkynningarskyldu um viðskipti innherja, innherjasvikum og markaðsmisnotkun.

Telji Kauphöllin að lög á verðbréfamarkaði kunni að hafa verið brotin vísar hún málum áfram til FME. Lögbundið eftirlitshlutverk með framangreindum þáttum hvílir eftir sem áður á Fjármálaeftirlitinu.