Metvelta á skuldabréfamarkaði

Velta á skuldabréfamarkaði nam 17,9 milljörðum króna í gær. Þetta er mesta velta ársins en annað eins hefur ekki sést síðan ríkið tók yfir bankana snemma í október í fyrra. Næstmesta veltan sem sést hefur eftir árið á markaðnum nemur í kringum sextán milljörðum króna.

Meðalvelta ársins fram til þessa nemur um 9,2 milljörðum króna á dag, samkvæmt upplýsingum frá Kauphöllinni.

Talið er að aukninguna í gær megi rekja til fyrirhugaðrar skuldabréfaútgáfu ríkissjóðs á morgun, sem vega á upp á móti fjárþörf hins opinbera vegna mikils halla á fjárlögum í ár. - jab