Íbúðaverð í höfuðborginni heldur áfram að lækka

Íbúðaverð á höfuðborgarsvæðinu lækkaði um 1,3% á milli nóvember og desember síðastliðinn samkvæmt upplýsingum sem Fasteignskrá Íslands birti í gær.

Greining Glitnis fjallar um málið í Morgunkorni sínu. Þar segir að íbúðaverð á höfuðborgarsvæðinu lækkaði um 2,5% að nafnverði á síðasta ári og um tæplega 18% að nafnvirði. Þetta er mikill viðsnúningur á þróun síðustu ára á en íbúðaverð á höfuðborgarsvæðinu hefur hækkað samfellt frá árinu 1995.

Þróunin nú er til marks um gjörbreytta stöðu á íbúðamarkaði og í hagkerfinu í heild. Markaðurinn hafði þegar náð hápunkti áður en fjármálakreppan skall á í byrjun október og umsvif og verð voru þegar byrjuð að dragast saman í upphafi ársins. Fjármálakreppan ýkir svo niðursveifluna til muna. Í upphafi síðasta árs nam 12 mánaða hækkun nafnverðs íbúða á höfuðborgarsvæðinu 15% en var um mitt ár komin niður í tæplega 4%.

Velta á íbúðamarkaði dróst saman um 65% á síðasta ári samanborið við árið 2007. Á síðasta ári voru gerðir samtals 3.400 kaupsamningar en árið 2007 voru samningarnir hinsvegar 10.000 talsins.