Hrun bankanna hefur kostað 6.600 manns atvinnuna

Atvinnulausum á Íslandi hefur fjölgað um rúmlega 6.600 manns frá því að íslenska bankakerfið hrundi í haust.

Greining Glitnis fjallar um málið í Morgunkorni sínu. Þar segir að atvinnuleysi hefur farið hratt vaxandi frá hruni stóru íslensku bankanna þriggja.

Samkvæmt skráningum á vinnumiðlanir eru nú 9.173 atvinnulausir á landinu öllu en voru 2.520 í lok september síðastliðinn eða rétt fyrir bankahrunið.

Fjöldi atvinnulausra hefur því aukist um 6.653 á ríflega þremur mánuðum. Fyrir ári síðan eða í upphafi árs 2008 voru 1.548 skráðir atvinnulausir. Í dag eru því nær sex sinnum fleiri skráðir atvinnulausir en fyrir ári síðan.