Gengisvísitala krónunnar heyrir sögunni til

Viðbúið er að sú mikla áhersla á gengisvísitölu krónu sem verið hefur í hérlendum gjaldeyrisviðskiptum síðustu ár heyri að verulegu leyti sögunni til. Slík viðskipti verði hér eftir fyrst og fremst með einstaka gjaldmiðla gagnvart krónunni.

Verður evran þar fyrirferðamest, enda er meira en helmingur utanríkisviðskipta okkar beint eða óbeint tengdur evru.

Greining Glitnis fjallar um málið í Morgunkorni sínu. Þar segir að í nýlegri tilkynningu á vef Seðlabankans kemur fram að bankinn hætti útreikningi vísitölu gengisskráningar, þ.e. þeirri sem í daglegu tali er kölluð gengisvísitala krónu, um áramótin.

Bankinn hefur um tveggja ára skeið reiknað fjórar vísitölur meðalgengis sem endurspegla utanríkisviðskipti á misbreiðum grunni, auk gengisvísitölunnar gömlu.

Þessar fjórar vísitölur munu hér eftir væntanlega taka við því hlutverki sem gengisvísitalan hefur gegnt sem viðmið fyrir almenna gengisþróun gagnvart öðrum gjaldmiðlum. Miða þær annarsvegar við vöruskipti og hinsvegar við vöru- og þjónustuviðskipti

Samkvæmt nýjum vogum fyrir vísitölurnar fjórar, sem gilda frá 1. desember síðastliðnum, er vægi evru á bilinu 45-47%, vægi Bandaríkjadollara og breska pundsins 10-11% fyrir hvora mynt og vægi dönsku krónunnar 7-8% eftir því við hvaða vog er stuðst.

Mikilvægi gengisþróunar evru fyrir utanríkisviðskipti er þó meira á heildina litið. Gengi dönsku krónunnar er þannig fast gagnvart evru og sama gildir um Eystrasaltslöndin. Sé þetta tekið með í reikninginn er heildarvægi evru, beint og óbeint, á bilinu 54 -55% í utanríkisviðskiptum.