Kjalar vill fá borgaðan gjaldeyrissamning á gengi Evrópska Seðlabankans

Forsvarsmenn fjárfestingarfélagsins Kjalar vilja að Kaupþing borgi þeim út gjaldeyrissamning á gengi Evrópska Seðlabankans, sem er um helmingi hærra en gengi Seðlabanka Íslands. Forstjóri félagsins neitar því að alfarið að félagið hafi tekið stöðu á móti krónunni.

Fjárfestingarfélagið Kjalar er að mestu í eigu Ólafs Ólafssonar kenndur við Samskip. Við upphaf síðasta árs hafði félagið gert gjaldeyrissamninga við Kaupþing. Þessir samningar fólu í sér að í október á síðasta ári átti Kaupþing að afhenda félaginu 650 milljónir evra gegn fastri greiðslu. Skilanefnd Kaupþings hafði þá tekið við bankanum og upphæðin ekki greidd.

Hjörleifur Jakobsson, forstjóri Kjalar, segir að á þeim tíma hafi mikil eftirspurn verið eftir evrum á Íslandi af hálfu erlendra aðila. Félagið telji að það hafi því getað selt evrurnar með verulegum hagnaði þá og að það hafi orðið af þessum hagnaði.

Forsvarsmenn Kjalars telja eðlilegt að við uppgjör hans verði stuðst við gengi Seðlabanka Evrópu frá því í október en þá skráði bankinn evruna á um 300 krónur. Seðlabanki Íslands skráði gengi evrunnar hins vegar helmingi lægra þá og ljóst að Kjalar fengi um hundrað milljörðum krónum meira ef samningurinn yrði gerður upp út frá gengi Evrópska Seðlabankans.

Með gjaldeyrissamningum líkt og þeim sem Kjalar gerði fá fyrirtækin meira ef að krónan veikist. Samningurinn er nokkuð stór, var hátt í hundrað milljarðar króna þegar hann var gerður eða sem nemur hátt í einum fimmta af varagjaldeyrisforða Íslendinga.

Hjörleifur þvertekur fyrir að með samningunum hafi félagið tekið stöðu á móti krónunni og átt þátt í að fella gengi hennar. Félagið hafi einungis verið að verja erlendar skuldir sínar. Hann sýndi fréttamanni hluta af ársreikningum félagsins því til staðfestingar. Þar sést að heildarskuldir félagsins voru um hundrað milljarðar króna um mitt síðasta ár.

Fréttmaður fékk þó ekki að sjá sundurliðun á skuldunum en Hjörleifur fullyrðir að þær hafi allar verið í erlendri mynt. Hjörleifur segir félagið eiga íslenskar eignir. Í ársbyrjun 2008 hafi það skuldað töluvert í erlendri mynt. Þeir hafi talið hættu á að krónan veiktist á þessu ári og því ákveðið að gera gjaldmiðlaskiptasamninga til að skuldirnar væru allar í íslenskum krónum en ekki í erlendri mynt.