Defoe var kynntur of snemma

Breska blaðið Daily Mail segir að forráðamönnum Portsmouth hafi blöskrað mikið þegar þeir sáu Jermain Defoe kynntan til sögunnar sem nýjasta leikmann Tottenham fyrir bikarleikinn gegn Burnley í fyrrakvöld.

Það sé vegna þess að félögin hafi alls ekki verið búin að koma sér saman um endanlegt kaupverð á framherjanum, þó hann hafi að sögn blaðsins samþykkt að skrifa undir fimm ára samning með um 60,000 pund í vikulaun.

Daily Mail segir að samningar muni takast með liðunum þrátt fyrir þessa fljótfærni í forráðamönnum Tottenham. Það muni væntanlega klárast í dag og Defoe því klár í slaginn gegn Wigan á JJB vellinum á laugardaginn.