Staða ríkissjóðs versnaði um 46 milljarða kr. í fyrra

Samkvæmt greiðsluuppgjöri ríkissjóðs fyrstu ellefu mánuði síðasta árs nam handbært fé frá rekstri 7,3 milljörðum kr. innan ársins, sem er 46,2 milljarða kr. verri útkoma heldur en á sama tíma í fyrra.

Innheimtar tekjur ríkissjóðs námu 393 milljörðum kr. sem er aukning um rúma 3 milljarða kr. frá sama tíma í árið áður, eða 0,9% aukning að nafnvirði. Tekjuáætlun ársins gerði ráð fyrir að innheimtar tekjur væru 398 milljörðum kr. og eru þær því um 5 milljörðum kr. undir áætlun.

Skatttekjur og tryggingagjöld námu 354 milljarða kr. sem er litlu hærri upphæð en árið 2007. Á sama tíma hefur almennt verðlag hækkað um 11,5% og skatttekjur og tryggingagjöld hafa því dregist saman um 10,2% að raunvirði. Aðrar rekstrartekjur jukust um 26,8% og þar af er mest hækkun á vaxtatekjum af bankainnstæðum.

Greidd gjöld nema 392,5 milljörðum kr. og hækka um 64,5 milljarða kr. frá fyrra ári eða um tæp 20%. Mest aukning er vegna almannatrygginga- og velferðarmála 20,1 milljarðar kr. eða 25,6%. Þar munar mest að lífeyristryggingar hækka um 10,8 milljarða kr. á milli ára, fæðingarorlofsgreiðslur um 1,5 milljarða kr. og vaxtabætur um 1,4 milljarða kr.