Peningaskápurinn ...

Töluvert er í lagt á 50 alþjóðaráðstefnu Seðlabanka Nígeríu 23. til 25. mars næstkomandi og margt merkra frummælenda. Og þótt við hér á norðurhjara könnumst kannski lítið við Chukwuma C. Soludo, seðlabankastjóra í Nígeríu eða prófessor Benno Ndulu seðlabankastjóra Tansaníu, þá eru þarna margir sem standa landinu nær og einna næst er þar Þorvaldur Gylfason, prófessor við Háskóla Íslands. Á öðrum degi ráðstefnunnar er hann í pallborði um myntbandalög meðal þróunar- og nýmarkaða. Fyrir umræðunum fer Robert Mundell, hagfræðiprófessor við Kólumbíuháskóla í Bandaríkjunum, og í pallborðinu eru með Þorvaldi, Paul Collier prófessor við Oxford, Jean Claude Trichet, bankastjóri Seðlabanka Evrópu og Andrew Berg frá Alþjóðagjaldeyrissjóðnum.

Annars er á ráðstefnu nígeríska seðlabankans annar sem mjög vel þekkir til Íslands, en það er Frederic S. Mishkin hagfræðiprófessor frá Kólumbíuháskóla, en hann lét nýverið af starfi aðstoðarbankastjóra í bandaríska seðlabankanum. Mishkin skrifaði í árslok 2006 merka skýrslu með Tryggva Þór Herbertssyni um íslenskt efnahagslíf eftir mikla vantraustsumræðu um bankakerfið hér. Ráðstefnuna situr líka Dominique Strauss-Kahn, framkvæmdastjóri Alþjóðagjaldeyrissjóðsins, Robert B. Zoellick forseti Alþjóðabankans, Alan Greenspan fyrrum seðlabankastjóri Bandaríkjanna, hagfræðiprófessorarnir Joseph Stiglitz og Jeffrey Sachs, fjárfestirinn George Soros og fjöldi annarra merkra spekninga efnahags- og fjármálalífs heimsins.