Vísar orðum Sverris Berg til föðurhúsanna

Hagar tóku yfir samninga við meira en 40 starfsmenn verslana BT, þegar BT verslanirnar urðu gjaldþrota í lok október síðastliðinn. Fyrrum eigendur höfðu ekki greitt laun fyrir októbermánuð, en starfsfólk fékk þau laun greidd eftir aðkomu Haga að BT. Þetta segir Finnur Árnason, forstjóri Haga, um harða gagnrýni Sverris Berg Steinarssonar, eiganda Árdegis sem rak BT verslanirnar, á vef Viðskiptablaðsins í gær. Finnur segir jafnframt að Sverrir fari með dylgjur um Haga.

Í samtali við Viðskiptablaðið sagði Sverrir að það væri sorglegt að sjá hvernig Hagar hafi spilað úr BT. Þeir hafi lokað öllum verslunum BT nema tveimur og það kæmi sér ekki stórkostlega á óvart þó þeim yrði lokað líka. „Það læðist að manni sá grunur að menn séu að hafa áhrif á samkeppnina með kaupunum," sagði Sverrir Berg í Viðskiptablaðinu. Hann sagði jafnframt að allar verslanir BT hafi verið með jákvæða afkomu en þær tvær verslanir sem eftir standi séu sístu búðirnar.

„Ekki þarf að fara mörgum orðum um trúverðugleika þessarar yfirlýsingar Sverris Berg, sem var ábyrgur fyrir rekstri verslana BT þegar þær urðu gjaldþrota og gátu ekki greitt laun," segir Finnur um orð Sverris