Geir útilokar ekki rannsókn á þróuninni eftir bankahrunið

Forsætisráðherra útilokar ekki að rannsóknarnefnd Alþingis verði einnig falið að rannsaka þætti sem áttu sér stað eftir bankahrunið.

Nefndinni er nú einungis ætlað að rannsaka aðdraganda og orsakir hrunsins. Þrír sitja í nefndinni, Páll Hreinsson, hæstaréttardómari, Tryggvi Gunnarsson, umboðsmaður Alþingis og Sigríður Benediktsdóttir kennari við hagfræðideild Yale-háskóla í Bandaríkjunum.

Nefndinni er ætlað að rannsaka aðdraganda og orsakir bankahrunsins og hefur víðtækar heimildir til að afla upplýsinga.

Á nefndin meðal annars að leggja mat á hvort um mistök eða vanrækslu hafi verið að ræða við framkvæmd laga og reglna um fjármálastarfsemi á íslandi og eftirlit með henni.

Nefndinni er þó ekki ætlað að safna upplýsingum og varpa ljósi á þá atburði sem áttu sér stað eftir bankahrun eða eftir að Neyðarlögin voru sett.

Geir H. Haarde forsætisráðherra útilokar þó ekki að sá þáttur verði rannsakaður sérstaklega.

„Það verður að koma í ljós í framhaldinu," segir Geir í samtali við Fréttastofuna. „Það er alveg hugsanlegt að þessi rannsóknarnefnd geri tillögur um það mál en einhversstaðar varð að setja lokapunkt við hennar störf og þótti eðlilegt að gera það við setningu neyðarlaganna þannig að það var alveg meðvituð ákvörðun. En ef það er eitthvað sem þarf að skoða sérstaklega eftir það þá er það gert."