Líftryggingarfélög skiluðu 1,5 milljarða hagnaði í fyrra

Þetta kemur fram á vefsíðu Fjármálaeftirlitsins. Þar segir að örlítið minni hagnaður var af líftryggingastarfsemi árið 2008 en árið áður, 1,3 milljarðar kr. samanborið við 1,4 milljarða kr.

Tekjur af fjármálastarfsemi tífölduðust hins vegar á milli ára, voru rúmlega 300 milljónir kr., samanborið við 30 milljónir kr. árið áður. Mikil breyting varð á eignasamsetningu félaganna á árinu, eign í verðbréfum með breytilegum tekjum (hlutabréfum og verðbréfasjóðum) lækkaði um 51% og eign í skuldabréfum lækkaði um 33%.

Eignir í sjóðum og bankainnstæðum jukust hins vegar úr 500 miljónum kr. í 2,7 milljarða kr. sem skýrir auknar tekjur af fjármálastarfsemi.

Eignir líftryggingafélaganna lækkuðu um 11,4% á milli ára. Þær voru í árslok 2008 um 12,2 milljarðar kr., samanborið við 13,8 milljarða kr. í árslok 2007.

Eigið fé líftryggingafélaganna nam 4,7 milljarði kr. og lækkaði á árinu um 7,5%. Fjárfestingar vegna söfnunarlíftrygginga (líftrygginga með fjárfestingaráhættu líftryggingartaka) drógust saman um 21,3% á árinu, að öllum líkindum bæði vegna rýrnunar eigna og innlausnar samninga.

Öll líftryggingafélögin eru dótturfélög annarra fyrirtækja. Tvö eru dótturfélög skaðatryggingafélaga, tvö eru dótturfélög banka og eitt er dótturfélag eignarhaldsfélags.