Segir Seðlabankann vondaufan um að krónan styrkist

Greining Íslandsbanka telur að Seðlabanki Íslands sé orðinn vondaufur um að krónan styrkist í náinni framtíð. Þetta kemur fram í Morgunkorni greiningarinnar þar sem fjallað er um fundargerð Peningastefnunefndar frá síðasta vaxtaákvörðunardegi en fundargerðin var birt í gær.

„Fundargerðin færir raunar misvísandi skilaboð af áhyggjum nefndarmanna af stöðu krónunnar. Þannig bentu sumir nefndarmann á að lágt gengi krónunnar styddi við enduruppbyggingu efnahagslífsins með því að bæta samkeppnisstöðu útflutningsgreina og annarra innlendra atvinnugreina sem væru í samkeppni við innflutta vöru og þjónustu," segir í Morgunkorninu.

„Ekki er örgrannt um að ákveðinn uppgjafartón megi merkja í umræðu nefndarmanna, enda bendir nýjasta gengisspá bankans ekki til þess að þar innan dyra eigi menn von á mikilli styrkingu krónunnar í bráð. Þar var spáð að meðalgengi evru gagnvart krónu verði 169 árið 2010 og 160 árið 2011, en til samanburðar er meðalgengi evru gagnvart krónu tæplega 168 kr. það sem af er ári."

Greiningin telur þetta athyglisvert í ljósi þess að bankinn starfar tímabundið eftir peningastefnu sem hefur það meginmarkmið að ná stöðugleika í gengi krónu og að bæði peningastefnunefndin og hinn nýi seðlabankastjóri, Már Guðmundsson, telja gengi hennar of lágt um þessar mundir.

Athygli vekur einnig að Anne Sibert virðist ekki hafa tekið þátt í ákvörðun nefndarinnar nú, en hún er annar tveggja nefndarmanna sem ekki koma frá Seðlabankanum sjálfum. Oft hefur mátt lesa á milli línanna að utanaðkomandi nefndarmennirnir hafi komið með önnur sjónarmið inn á fundi nefndarinnar en innanbúðarmenn í Seðlabanka.

Næsta vaxtaákvörðun Peningastefnunefndar, og hin fyrsta sem nýr Seðlabankastjóri leiðir, verður þann 24 september næstkomandi.