Gjaldfallin skuldabréf Glitnis hækka í verði erlendis

Gjaldfallin skuldabréf Glitnis hafa meir en tvöfaldast í verði erlendis þar sem fjárfestar telja nú að skilanefnd bankans takist að endurheimta meira fé úr eignum bankans en áður var talið.

Samkvæmt frétt á Bloomberg-fréttaveitunni hafa skuldabréfin hingað til verið seld á 6% af nafnverði eða 6 sent fyrir evruna. Verðið hefur nú hækkað í 14 sent eftir að fundur var haldinn með kröfuhöfum bankans í London í síðustu viku á vegum KNG Securities.

Um er að ræða varin skuldabréf Glitnis en KNG segir að ekkert muni fást fyrir óvarin skuldabréf sem bankinn gaf út fyrir bankahrunið á Íslandi s.l. haust.

Bloomberg hefur eftir Bill Blain verðbréfasala hjá KNG að skuldabréfin hafi snarhækkað í verði þessa vikuna sökum væntinga fjárfesta um að mun meira fáist upp í skuldir Glitnis en áður var talið.

Eins og fram hefur komið í fréttum þessa vikuna er talið að skilanefnd bankans nái að endurheimta um 20-40% af eignum bankans upp í skuldir hans.