Skilanefnd segir lánapakkann frá Kaupþingi í Svíþjóð ágætan

Steinar Guðgeirsson formaður skilanefndar Kaupþings segir að lánapakki sá sem skilanefndin yfirtók við söluna á Kaupþingi í Svíþjóð til Ålandsbanken sé í ágætu lagi. "Þetta eru hvorki verri né betri lán en gengur og gerist á markaðinum í dag," segir Steinar.

Eins og fram kom í fréttum í morgun yfirtók skilanefndin fyrirtækjalán og aðrar eignir Kaupþings í Svíðþjóð við söluna. Samtals nema þessi lán og eignir um 4 milljörðum sænskra kr. eða um 54 milljörðum kr..

Steinar segir að þeir séu ánægðir með söluna á Kaupþingi í Svíþjóð og verðið sem fékkst fyrir þá starfsemi. "Þetta líka léttir undir með okkur og við losnum við ákveðin vandamál í Svíþjóð með sölunni," segir Steinar.

Það kom einnig fram í tilkynningu frá Ålandsbanken að forráðamenn hans eru hæstánægðir með kaupin á Kaupþingi.

Eitt vafaatriði er í öllu málinu en það er áhættan sem Kaupþing yfirtekur vegna hruns Lehman Brothers á síðasta ári. Þar mun vera um að ræða nokkur hundruð milljónir sænskra kr. sem Kaupþing lánaði Svíum til kaupa á hlutabréfum í Lehmans á sínum tíma. Ekki er vitað hve mikið fæst endurheimt af þeim lánum.