Glitnir gæti tapað tugum milljarða á Moderna-málinu

Ekki liggur fyrir hvort sænska fjármáleftirlitið samþykki hugmyndir skilanefndar Glitnis um að flytja íslenskar eignir Moderna til Íslands. Bankinn gæti tapað tugum milljarða króna náist ekki samkomulag um málið.

Moderna er dótturfélag Milestone í eigu bræðranna Karls og Steingríms Wernerssona. Staða Milstone hefur vernsað verulega á á undanförnum mánuðum. Í byrjun árs námu heildarskuldir félagsins tæpum 120 milljörðum króna en eignir voru metnar á 60 milljarða.

Meðal félaga í eigu Moderna má nefna Tryggingafélagið Sjóvá og Askar Capital en félagið er skrásett í Svíþjóð.

Eins og greint var frá í síðustu viku hefur skilanefnd Glitnis sóst eftir því að fá að flytja íslenskar eignir Milestone til Íslands. Var skilanefndin tilbuín að leggja félagin til stóraukið rekstrarfé í þeim tilgangi.

Stærstu lánadrottnar Moderna hafa samþykkt hugmyndir skilanefndar en málið virðist stranda á sænska fjármálaeftirlitinu sem þarf að samþykkja gjörninginn.

Fulltrúar frá skilanefnd Glitnis funduðu með sænska fjármáleftirlitinu í síðustu viku og er nú beðið eftir svari frá Svíum.

Árni Tómasson, formaður skilanefndar Glitnis, sagði í samtali við fréttastofu nú í morgun að fallist Svíar ekki á þessar hugmyndir gæti tap bankans numið tugum milljörðum króna.