Greining Glitnis spáir 18,3% verðbólgu í febrúar

Greining Glitnis spáir því að vísitala neysluverðs (VNV) muni hækka um 1,1% í febrúar. Gangi spáin eftir mun tólf mánaða taktur verðbólgu verða 18,3% og verðbólga mæld með þeim hætti því hjaðna um 0,3 prósentustig frá fyrri mánuði.

Fjallað er um verðbólguspá greiningarinnar í Morgunkorninu. Þar segir að útsölulok setja svip sinn á mælingu febrúarmánaðar og gerir greiningin ráð fyrir föt og skór hækki um ríflega 11% vegna þessa, sem hefur áhrif til 0,5% hækkunar VNV. Áhrif útsöluloka á annan varning á borð við húsbúnað og tækjakost eru einnig nokkur. Við þetta bætast áhrif af gengislækkun krónu á seinni hluta síðasta árs. Á hinn bóginn er gert ráð fyrir að húsnæðisliður vísitölunnar lækki lítillega.

Margt bendir nú til að hátindi verðbólguskotsins sem staðið hefur undanfarið ár sé loks náð. Ef spá greiningarinnar um verðbólguþróun reynist á rökum reist mun VNV hækka um tæpt prósentustig samanlagt í mars og apríl. Á sama tímabili í fyrra hækkaði VNV hins vegar um tæp 5%, og því allar líkur á að 12 mánaða verðbólga hjaðni verulega á vormánuðum.

kjölfarið gerir greiningin ráð fyrir að áfram dragi úr verðbólgu, og spáir því að verðbólga verði komin undir 5% að ári liðnu. Á seinni hluta spátímans telur greiningin að verðbólga reynist lítil og raunar eru töluverðar líkur á að verðhjöðnun eigi sér stað um skeið einhvern tíma á næstu misserum.