Mikið tap á sjóðnum Fyrirtækjabréf Landsbankans

Stjórn Landsvaka hefur sent hlutdeildarskírteinishöfum í sjóðnum Fyrirtækjabréf Landsbankans bréf þar sem kemur fram að mikið tap verður á sjóðnum.

Ætlunin er að hefja greiðslur úr sjóðnum 1. apríl og borga skírteinishöfum út í samræmi við hlutdeild þeirra. Jafnframt verður sjóðnum slitið.

Fram kemur í bréfinu að tæplega 38% af heildareignum sjóðsins var bundið í skuldabréfum gömlu bankanna þriggja sem og Samson ehf. "Ljóst er að þessar eignir hafa að stærstum hluta tapast," segir í bréfinu.

Í list yfir eignir sjóðsins sést að staðan er ekki beysin. Fyrir utan framangreint tap má reikna með að bréf í Exista séu einnig glatað fé en þau námu 4,2% af sjóðnum. Þá er spurning hve mikið fæst fyrir Landic (6,4% af sjóðnum) og Egla (2% af sjóðnum).

Lauslega áætlað munu skírteinishafar fá töluvert undir hálfvirði af eign sinni borgað út úr sjóðnum. Enda segir í bréfinu: "Við þetta bætist að mörg íslensk fyrirtæki standa höllum fæti í þeim efnahagserfiðleikum sem þjóðfélagið glímir nú við og því ríkir mikil óvissa um hverjar endanlegar heimtur verða á þeim fyrirtækjaskuldabréfum sem sjóðurinn á."