Given fær leyfi til að ræða við Man City

Newcastle hefur gefið Shay Given leyfi til að ræða við Manchester City um kaup og kjör og því útlit fyrir að hann sé á leið frá félaginu.

Talið er að Newcastle vilji fá átta milljónir punda fyrir Given en áður hafði Joe Kinnear, knattspyrnustjóri Newcastle, sagt að upphaflega tilboð City upp á fimm milljónir hafi verið hrein móðgun.

Given kom ekki við sögu í leik Newcastle og City á miðvikudaginn en hann hefur áður sagt að hann vilji komast í burtu frá félaginu þar sem hann hefur verið undanfarin tólf ár.

Given hefur á þeim tíma spilað 461 leik fyrir Newcastle síðan hann kom til félagsins árið 1997 frá Blackburn.