Viðsnúningur á vöruskiptum nam 122 milljörðum kr.

Vöruskiptajöfnuðurinn í fyrra var 121,9 milljörðum króna hagstæðari en á sama tíma árið áður að því er segir á vefsíðu Hagstofunnar.

Samkvæmt bráðabirgðatölum voru fyrir allt árið 2008 fluttar út vörur fyrir 467,1 milljarð króna en inn fyrir 472,7 milljarða króna. Halli var á vöruskiptunum við útlönd samkvæmt bráðabirgðatölum, sem nam 5,6 milljörðum en á sama tíma árið áður voru þau óhagstæð um 127,5 milljarða á sama gengi.

Samkvæmt bráðabirgðatölum voru í desembermánuði fluttar út vörur fyrir tæpa 54,0 milljarða króna og inn fyrir 29,8 milljarða króna. Vöruskiptin í desember voru því samkvæmt bráðabirgðatölum hagstæð um 24,2 milljarða króna. Í desember 2007 voru vöruskiptin óhagstæð um 16,7 milljarða króna á sama gengi.

Samkvæmt bráðabirgðatölum fyrir árið 2008 var heildarverðmæti vöruútflutnings 35,1 milljarði meira en á sama tíma árið áður eða 8,1% á föstu gengi.

Iðnaðarvörur voru 52,1% alls útflutnings og er þetta fyrsta árið, frá því að skráning á árlegum útflutningi hófst með reglubundnum hætti árið 1862, sem iðnaðarvörur eru meiri en helmingur alls útflutnings og hlutdeild þeirra hærri en sjávarafurða..

Sjávarafurðir voru 36,6% alls útflutnings og hefur hlutfall sjávarafurða af heildarútflutningi ekki verið lægra síðan 1865. Verðmæti þeirra var 5,3% minna en á sama tíma árið áður

Samkvæmt bráðabirgðatölum var verðmæti vöruinnflutnings á árinu 2008 86,8 milljörðum minna eða 15,5% á föstu gengi en á sama tíma árið áður. Stærstu liðir innflutnings 2008 voru hrá- og rekstrarvara með 31,8% hlutdeild og fjárfestingarvara en hlutur þeirra var 20,8%.