Utanferðum Íslendinga fækkaði um 47% í desember

Íslendingar hafa dregið verulega úr ferðum sínum til útlanda ef marka má tölur um brottfarir um Leifsstöð á árinu. Í desember fækkaði utanferðum Íslendinga um 47% miðað við sama mánuð árið á undan.

Greining Glitnis fjallar um málið í Morgunkorni sínu. Þar segir að engan þurfi að undra að dregið hafi úr ferðagleðinni miðað við það ástand sem nú ríkir í hagkerfinu í kjölfar bankahrunsins. Þá hefur kaupgeta Íslendinga í útlöndum dregist saman á undanförnum mánuðum samhliða veikingu krónunnar en raungengi krónu er ennþá langt undir meðaltali síðustu áratuga.

15.500 Íslendingar létu þetta samt ekki stoppa sig og héldu utan í desembermánuði þrátt fyrir veika krónu og óvissu í hagkerfinu. Þetta er þó mikil fækkun samanborið við sama mánuð árið 2007 en þá héldu 29.000 íslendingar utan í jólamánuðinum og fækkaði þeim því um 47% á milli ára.

Utanlandsferðum Íslendinga hefur fækkað allt frá miðju síðustu ári. Sú þróun varð svo hraðari með haustinu eftir að kreppan braust út. Í október fækkaði íslenskum ferðalöngum um 32% samanborið við fyrra ár, í nóvember var fækkunin á milli ára 59% og nú í desember varð fækkunin 47% eins og fyrr segir. Í heild fækkaði brottförum íslendinga um 10% á síðasta ári miðað við árið 2007.

Erlendum gestum sem heimsóttu Ísland fjölgaði hinsvegar á síðasta ári og nam aukningin 3% frá fyrra ári. Fjöldi erlendra gesta sem sóttu Ísland heim á síðasta ári fór í fyrsta skipti yfir hálfa milljón manns.